2020 Rhapsody (Vol. 1)

written by Rakesh Leel

           "Khul-kar saans mujhe le lene doun,

            Zinda toh main bhi hoon, ye ehsaas toh le lene doun."

JAN-G  mein toh hum sab hain

           Naye saal mein, kuch government se jang mein they,

           Toh kayi-yon ki jang apne aap se thi, naye saal ke resolution jo lene they,

           Violence, pollution, protest toh maano roz ke kisse they, 

           Meri jang insaano se thi, jo dheere-dheere jaanvar ho chale they.

FEB-ULOUSNESS  is under the bus

           Sunne mein aaya hain ki naya virus aaya hain,

           Maano, ye toh ek aasha ki kiran laaya hain,

           Budget ka paisa laga kar, tum mujhe kaant dogey,

           Kisi ke 'Namaste' ke liye, deewar baandh kar, gareebon ko chupa dogey.

MAR-K  of the pandemic

            Lockdown ki shuruat hogayi hain, jiski aadat toh humein college se thi,

            Hawaayein saaf ho chali thi, gaadiyan sadkon pe jo na thi,

            Dekh dekh kar toh humnein internet ko chaat liya,

            Do chaar khaana banana toh humnein bhi sikh liya.

APR-ON  on the forefront

            Apron pehenkar wo safed, khade hain wo sabse aagey,

            Naa jaane kitne din aur raat se hain wo jaagey,

            Wo, bewkoofon ke pattharon se lade, apne parivar se dur wo rahe,

            Na apne liye, balki tumhari liye, na jaane kitne dard sahe.

MAY-HEM  everywhere

            Mayhem ho raha chaaron aur, migrants ko lekar,

            Daya ki bhawna umad rahi, unn paidal chehron ko dekh kar,

            Kahin bhoonk pyaas hain, toh kahin zinda laash hain,

            Usko na apni bhool ka andaaza, na jaane uski khata,

            Pata na usko Italy ya US ka, ab toh na raha apne ghar ka pata.

JUN-OON  sawwar hain

            Mujhe pata hain junoon se phir tum chal padoge,

            Khured kar mujhko, ghaav purane de chaloge,

            Laal rang se, udgam sthal nadiyon ka tum bhar dogey,

            Safed pahado ka batwaara kar, phir nayi lakeer kheench dogey.

 

  "Khul-kar saans mujhe le lene doun,

   Zinda toh main bhi hoon, ye ehsaas toh le lene doun."

'Save Me'

Happy World Environment Day !

 

© 2020 Rakesh Leel